ЯҢАЛЫКЛАР
12 март көнне Венера Сафиуллина җитәкчелегендә булган «Әкият» курчак театры Федоровское авылының картлар һәм инвалидлар интернат-йорты өлкән кешеләре өчен әкият бүләк итте.
"Татарстан Республикасы эшкуарлыкка ярдәм итү фонды" коммерциячел булмаган микрокредит компаниясенең Татарстан Республикасы Кайбыч муниципаль районындагы төбәк вәкиле итеп Гаранина Ләйсән Касым кызы билгеләнде.
Татарстан Республикасы буенча Россия кулланучылар күзәтчелеге идарәсенең территориаль бүлеге ел саен 15 мартта билгеләп үтелә торган Бөтендөнья кулланучылар хокукларын яклау көне алдыннан кулланучылар хокукларын яклау буенча “кайнар линия” эшен оештырды.
Бүген район башлыгы Альберт Рәхмәтуллин башкарма комитеты җитәкчесенең төзелеш һәм торак-коммуналь хуҗалык буенча урынбасары Фирдүс Әхмәтов белән берлектә төзелеш һәм капиталь ремонт объектларын карады.
Шушы көннәрдә Иске Чәчкаб авылында яшәүче Вәлиәхмәтова Сания Сәлим кызы 60 яшьлек юбилеен билгеләп үтте. Район башлыгы исеменнән юбилярны район башлыгы урынбасары Рәмис Хәялиев котлады. Ул аңа нык сәламәтлек, озын гомер теләде, шулай ук район башлыгының рәхмәт хатын тапшырды. Сания Сәлимовнаны шулай ук Олы Кайбыч авыл җирлеге башкарма комитеты җитәкчесе Рәмис Сафин һәм Иске Чәчкаб төп мәктәбе директоры Айдар Хәсәнов та котлады.
Татарстанда авыл хуҗалыгы җитештерүчеләренә минераль ашламалар сатып алуга максатчан бюджет акчалары бирелә. Бу акчаларны бер гектар чәчүлек мәйданына кимендә 30 кг минераль ашлама туплау турында документлар тапшырган очракта гына алырга мөмкин булачак, дип искәртә Татарстан Республикасы Авыл хуҗалыгы һәм азык-төлек министрлыгы.
Проектның төп яңалыгы азык-төлек иминлеге күрсәткечләрен исәпләү методикасын үзгәртүдән гыйбарәт. Аны бәяләү өчен гомуми эчке базар күләмендә үзебезнең җитештерүнең чагыштырма күләме урынына үз-үзен тәэмин итү күрсәткечен кулланырга тәкъдим ителә.
Ел саен 12 март көнне илебездә 2010 елның 16 ноябрендә РФ Президентының 1433 номерлы указы белән расланган Россия Федерациясе Юстиция министрлыгы җинаять-башкарма системасы эшчеләренең һөнәри бәйрәме билгеләп үтелә. Бу көнне уздыру датасы очраклы рәвештә генә сайланмаган. 1879 елның 12 мартында Россия императоры Александр II Россиядә бердәм дәүләт җәзаларны үтәү системасын оештыруга юл ачкан төрмә департаментын булдыру турында указ игълан иткән.
Бүген район башлыгы Альберт Рәхмәтуллин шушы көннәрдә туган көннәрен билгеләп үткән җитәкчеләрне котлады. Болар - "Колаңгы икмәк кабул итү предприятиесе" ҖЧҖ филиалы директоры Рәис Газизов,"СКУЛАВТО" начальнигы Айрат Хәсәнов, районның авыл хуҗалыгы һәм азык-төлек идарәсе башлыгы Фиргат Басыйров, Ябалак авыл җирлеге башлыгы Мөслимә Гыйззәтуллина, Колаңгы авыл җирлеге башлыгы Фидаил Нигъмәтҗанов, "Кайбыч муниципаль районы Башкарма комитеты" гомуми бүлеге начальнигы Игорь Федотов, Татарстан Республикасы Хезмәт, халыкны эш белән тәэмин итү һәм социаль яклау министрлыгының Кайбыч районындагы социаль яклау бүлеге начальнигы Чулпан Камалиева, Татарстан Республикасында "Росгосстрах" агентлыгы башлыгы Рәшит Хәялиев.
Бүген Казанда Татарстан Республикасы Президенты Р. Н. Миңнеханов каршындагы Эшкуарлык советының үнберенче киңәйтелгән утырышы узачак. Чакырылган экспертлар һәм бизнес-җәмәгатьчелек вәкилләре белән ТР Президенты һөнәри керемгә салым кертү һәм куллану нечкәлекләре турында фикер алышачак.