ЯҢАЛЫКЛАР
17-19 май көннәрендә Казан шәһәренең Бадминтон үзәгендә 11 яшькә кадәрге егетләр һәм кызлар арасында "Россия милли бадминтон федерациясе беренчелеге" уңышлы тәмамланды. Турнирда Россиянең 15 регионыннан 120 дән артык иң көчле яшь спортчы катнашты, алар арасында Татарстан вәкилләре дә бар иде. Әлеге ярышларда Татарстан Республикасы командасын Казан, Яр Чаллы, Алексеевск, Саба, Кама Тамагы, Балык Бистәсе, Түбән Кама, Кайбыч, Әлмәт, Чистай, Лаеш һәм Тукай районнары спортчылары тәкъдим итте.
2019 елның 1 гыйнварыннан "Федераль әһәмияттәге Мәскәү шәһәрендә, Мәскәү һәм Калуга өлкәләрендә, шулай ук Татарстан Республикасында (Татарстан) "Һөнәри керемгә салым" махсус салым режимын билгеләү буенча эксперимент үткәрү турында 2018 елның 27 ноябрендәге 422-ФЗ номерлы Федераль закон үз көченә керде.
18 май көнне Олы Кайбыч авылында "Салават күпере" спорт комплексында авыл җирлекләренең хатын-кызлар командалары арасында волейбол буенча район Чемпионатының финал этабы узды. Нәтиҗәдә, тренер Юрий Григорьев җитәкчелегендә Федоровское авылы волейболчылары җиңү яулады. Икенче-өченче урында Олы Кайбыч һәм Кече Мәме авыл җирлекләре командалары, дүртенче урында Кошман волейболчылары. Без волейбол сөючеләрне волейбол чемпионатларының уңышлы тәмамлануы белән котлыйбыз, ә алда безне әле "Сабантуй" турниры көтә.
18 май көнне Олы Кайбыч авылында "Салават күпере" спорт комплексында 5-9 нчы сыйныф укучылары арасында бадминтон буенча традицион ел саен үткәрелә торган турнир узды, анда 13 команда катнашты, алар составында 4әр егет һәм 4әр кыз чыгыш ясады. Нәтиҗәдә, турнир җиңүчеләре һәм кубок ияләре өченче ел рәттән тренер-укытучы Хәмзә Юнысов җитәкчелегендә Борындык төп мәктәбенең бадминтончылары булды. Икенче урынны тренер-укытучы Юрий Григорьев җитәкчелегендәге Федоровское урта мәктәбе бадминтончылары яулады, мактау пьедесталының өченче баскычына тренер-укытучы Фрат Җиһаншин җитәкчелегендәге Мөрәле төп гомуми мәктәбенең җыелма командасы күтәрелде. Турнирның барлык җиңүчеләрен һәм призерларын котлыйбыз һәм барысына да яңа уңышлар телибез!
19 май көнне Кама Тамагының "Акчарлак" спорт-сәламәтләндерү комплексында бадминтон буенча "Татарстанның бадминтон өметләре" республика ярышларының зона сайлап алу этабы узды. Аның нәтиҗәләре буенча Егор Григорьев, Катерина Иванова, Григорий Вавилов, Данил Улитин (барысы да Федоровское авылыннан), Арина һәм Никита Алексеевлар, Богдан Гашев (Олы Кайбыч авылы) 1-2 июньдә Казан шәһәрендә узачак финал этабына чыктылар. Спортчыларыбызга уңышлы чыгыш ясауларын һәм яңа спорт уңышлары телик!
Бүген эшлекле киңәшмәдә район башлыгы Альберт Рәхмәтуллин шушы көннәрдә туган көннәрен билгеләп үткән җитәкчеләрне - район электр челтәре начальнигы Равил Вишняков һәм почта элемтәсе бүлеге начальнигы Гөлсәрия Галиәскәрованы котлады. Район башлыгы аларга эшләрендә һәм тормышта уңышлар теләде.
Бүген район Советы һәм Башкарма комитетының актлар залында Кайбыч муниципаль район башлыгы Альберт Рәхмәтуллин җитәкчелегендә оешма һәм учреждение җитәкчеләре, авыл җирлекләре башлыклары катнашында киңәшмә узды.
18 май көнне Буа шәһәрендә "Буа-диалог киңлеге" III Халыкара милли театрлар фестивале кысаларында ТР мәдәният министры Ирада Әюпова фестивальдә катнашучылар белән очрашты. Анда безнең районнан мәдәният бүлеге начальнигы Рамилә Әбләзова катнашты.
17 май көнне, "Буа:Диалог киңлегендә" фестивале кысаларында, Кайбыч районы мәдәният йорты Буа Дәүләт Драма театры артистларын кабул итте. Алар балалар өчен урыс телендә "Перекрёсток снов" дип исемләнгән курчак театрын сәхнәләштерделәр.
Районыбызның төрле мәктәпләреннән килгән балалар спектакльне бик яратып кабул иттеләр, кунакларның хезмәтен югары бәяләп, залны көчле алкышларга күмделәр.
18 майда Казанда Бөтенроссия робот техникасы олимпиадасының республика этабы узды. Анда безнең районнан "ЭКО" мәктәптән тыш эшләр үзәгенең өстәмә белем бирү педагогы Марат Вәлиев җитәкчелегендә техник юнәлешле укучылары- Сардор Зикрин һәм Ислам Нәсретдинов катнашты. Алар "Супергерой" бәйгесендә 3 нче урынны алды. Без аларны котлыйбыз!