Кече Кайбыч авылында ураза тотучылар өчен ифтар мәҗлесе үтте

Чәршәмбе көнне Кече Кайбыч авылы мәчетендә үткән ифтар мәҗлесенең чыгымнарын шушы авылда яшәп, бакыйлыкка күчкән Сәгыйрә апа белән Вәгыйз ага Нуруллиннарның балалары: Зөфәр, Мөдәрис, Гүзәлия, Лүзия һәм Рузилә гаиләләре үз өстенә алган. 

Әлеге мәҗлестә район башлыгы Альберт Рәхмәтуллин, Ябалак авыл җирлеге башлыгы Мөслимә Гыйззәтуллина да катнашты. Мәҗлес алдыннан авыл имамы Мәгъсүм хәзрәт Тимершин вәгазь сөйләде, авыз ачкач, барысы бергә кичке намаз укыдылар. Мәҗлес Мәгъсүм хәзрәтнең Коръән сүрәләре укуы белән башланды. 

Районыбыз башлыгы Альберт Рәхмәтуллин барлык дин кардәшләрен изге Рамазан ае белән котлап, теләкләрен җиткерде: 

- Аллага шөкер, районыбызда 17 мәхәллә эшләп килә. Имамнар да үз җирлегебездән чыккан кешеләр. Изге Рамазан аендә игелекле гамәл кылып, ураза тотучыларга ифтар мәҗлесе оештырган Нуруллиннар нәселенә олы рәхмәт сүзләремне җиткерәм. Ходайга шөкер, хәзерге заманда бөтен әйбер бар, халыкның яшәү шартлары да яхшы. Биредә утыручы өлкәннәр хәзер бәхетле, чөнки алар авыр сугыш елларында тормышның ачысын, төчесен татыдылар, хәзерге мул, тыныч тормышны да күрделәр. Алдагы көннәрдә дә бергә, дус-тату, тыныч, мул тормышта яшәргә насыйп итсен. Бу мәҗлесне оештыручыларның гаиләләренә Аллаһы Тәгалә ныклы сәламәтлек, гаилә бәхете, мул тормыш телим, бүген чыгарган чыгымнары үзләренә меңе белән әйләнеп кайтсын, - диде ул. 

Авылдашларына рәхмәт сүзләре белән Нуруллиннарның олы уллары Зөфәр, кече кызлары Рузилә дә мөрәҗәгать итте.