Татарстан музейлары язы – 2016

Табигатьтә яз хөкемлек итә. Ел фасылларының һәрберсе диярлек безнең күңелләребездә үзенең ниндидер үзенчәлекле даталары, матур бәйрәмнәре, онытылмас вакыйгалары белән истә кала. Ә 2016 нчы ел - безнең районыбыз өчен бик истәлекле ел.  Быел Кайбычның яңадан мөстәкыйльлек алуына 25, опера сәхнәсе йолдызы, якташыбыз ТАССРның халык артисткасы Галия Кайбицкаяның һәм бөек якташыбыз, композитор Латыйф Хәмидинең тууына 110 ел тула һәм башка үзенчәлекле даталар.

     Татарстан музейларында менә инде 3 нче ел рәттән апрель аенда “Татарстан музейлары язы” – дигән акция үткәрелә. Бу акциягә 2014 нче елда старт бирелде. Галия Кайбицкая музее ике ел рәттән акциянең дипломатлары һәм быелда читтә калмыйбыз. Акциянең максаты музейлар арасындагы партнерлык тәҗрибәсен булдыру, музейга халыкны, яшь буынны һәм матбугат чараларын җәлеп итү.

     Быел акция 21 нче апрельдән 26 нчы апрельгә кадәр үтәчәк. Акция кысаларында Галия Кайбицкая музеенда узачак чаралар:

1. 21 нче апрель.  “Мин Россия гражданины. Мин Татарстан баласы” –дип аталган тантаналы чара. 14 яше тулган яшьүсмерләргә тантаналы төстә паспортлар тапшыру. Район җитәкчелеге, паспорт өстәле, музей хезмәткәрләре тарафыннан әзерләнә һәм тапшырыла. Әти - әниләр, яңа паспорт ияләренең дуслары, якыннары да чакырыла.
2. 22 нче апрель. “Кайбычымның гүзәл табигате – Бәрле суы, Зөя буйлары” - дигән музей дәрес. Районыбыз укучыларын районыбызның сулыклары, гүзәл табигате белән таныштыру. 2016 ел - Татарстанда су саклау зоналары елы.
3. 23 нче апрель. “Тукайны үз иткән якташ”. Якташыбыз Мотыйгулла хәзрәт һәм Габдулла Тукайга багышланган лекция - дәрес. Тукайның Җаек шәһәрендәге гомер еллары турында фикер алышулар.
4. 24 нче апрель. “Иң мәдәни сыйныф”. Мәдәни көндәлек проекты буенча райондагы иң актив сыйныфны музейга чакырып түгәрәк өстәл артында фикер алышу.
5. 26 нчы апрель. Туган тел һәм Габдулла Тукайның туган көненә багышланган   тантаналы чара: “Без Тукай оныклары”. Район җитәкчелеге, район мәктәпләре, мәдәният хезмәткәрләре тарафыннан үткәрелә.

     Барлык райондашларыбызны, районыбыз мәктәпләрен  “Татарстан – музейлары язы – 2016” акциясе кысаларында музеебызда көтеп калабыз. Катнашырга теләк белдерүчеләрдән 2016 нчы елның 15 нче апреленә кадәр музей дирекциясенә телефон яисә электронка аша заявкалар кабул итәбез. Барыгызныда бу күркәм мәдәни чараларда көтеп калабыз!

Эльмира Сафина,

музей директоры.