Саба районыннан 11 яшьлек Әнисә Зарипова Халыкара балалар дөнья картасы конкурсында катнашуга номинацияләнгән
Быел конкурсның Россия этабында бөтен илдән 260тан артык бала катнашты
Барбара печеник исемендәге Халыкара балалар дөнья картасы конкурсының Россия этабы жюри утырышы йомгаклары буенча, һәр яшь категориясендә җиңүчеләр билгеләнде, Саба районыннан Әнисә Зарипова 9 яшьтән 12 яшькә кадәрге яшь категориясендә 1 урынны яулады. Конкурска «Гармония»эше тәкъдим ителде. Шулай ук Татарстан Росреестры хезмәткәренең кызы конкурсның халыкара этабында катнашуга номинацияләнгән. Аның нәтиҗәләре 2025 елның августында Ванкуверда Халыкара картография конференциясендә игълан ителәчәк.
4 нче сыйныф укучысы Әнисә Зариповага күптән түгел 11 яшь тулды. Татарстан Росреестрында эшләүче әнисе Эльмира Зарипова сөйләвенчә, кызы кечкенәдән үк рәсем ясарга ярата, Саба сәнгать мәктәбендә икенче ел гына шөгыльләнә, ләкин яхшы нәтиҗәләргә ирешә. Әнисә шулай ук хореография белән дә мавыга.
"Географик карталар хәзерге заманның мөһим коралы булып кала: алардан башка дәүләт планлаштыруы, территорияләрне үстерү, заманча хезмәтләр күрсәтү һәм навигация мөмкин түгел. Һәр кешенең карталар белән танышуы мәктәп яшенә кадәр үк башлана, һәм Росреестр иҗади конкурслар, агарту чаралары ярдәмендә балаларга яхшырак ориентлашырга, аларны үз тормышында куллана белергә ярдәм итә, мәсәлән, гаилә сәяхәтләрен планлаштырганда. Барлык балаларга картографиягә гадәти булмаган карашлары өчен рәхмәт белдерәм һәм призерларны чын күңелдән котлыйм. Халыкара этапта катнашучыларга башка илләрдән яшьтәшләре белән иҗади ярышта уңышлар телим", - диде Росреестр җитәкчесе Олег Скуфинский.
Халыкара конкурс турында
Балалар дөнья картасы конкурсы халыкара картография ассоциациясе (МКА) тарафыннан үткәрелә. Бу картография һәм геопространство мәгълүмат өлкәсендә белгечләрне берләштерүче халыкара хөкүмәтнеке булмаган иң эре оешма. Ул 1959 елда картография фәнен үстерү максатларында гамәлгә куела. Ассоциация эшчәнлегендә Россия Федерациясен Росреестр тәкъдим итә.
1993 елда күренекле картограф Барбара Печеник истәлегенә халыкара картография ассоциациясе ике елга бер тапкыр үткәрелә торган балалар дөнья картасы конкурсын гамәлгә куя.
Барбара Печеник АКШТА 1939 елда туган, гомере буена ул балаларның карталарны кабул итү мәсьәләсен тикшергән, балалар карталары һәм атласлар булдыру белән шөгыльләнгән. 1991 елда Барбара Печеник МКА вице-президенты итеп сайланган беренче хатын-кыз була.