Рәхмәт сүзе
«Олы Кайбыч урта мәктәбенең ата-аналар комитетына «Тату сыйныф серләре» проектында катнашырга туры килде. Командабызда укытучылар, тәрбиячеләр, табиблар, эшмәкәрләр һ.б. һөнәр ияләре бар иде. Эшебез тыгыз булуга карамастан, конкурска 4 ай дәвамында даими рәвештә әзерләндек. Апаста узган зона этабында, Яр Чаллыда ярымфиналда, Мөслимдә суперфиналда осталыгыбызны күрсәттек. Һәр этапта туган ягыбыз Кайбыч районы данын яклап, лаеклы чыгыш ясадык һәм республика буенча 1нче урынга чыктык! Районыбыз башлыгы Рәхмәтуллин Альберт Илгизәр улына аерым рәхмәтебезне җиткерәсебез килә. Ул безнең җиңүебезне хөрмәтләп, Кайбыч районы туган көне уңаеннан бәйрәмдә рәхмәт хатлары, чәчәкләр һәм «Туган як» кафесына банкетка сертификат тапшырды. Барлык ата-аналар исеменнән Альберт Илгизәр улына безнең эшебезне югары бәяләгәне өчен рәхмәт әйтәсебез килә. Шулай ук Кайбыч урта мәктәбе директорының тәрбия эшләре буенча урынбасары Гөлинә Җәүдәт кызына безгә ышанганы һәм талантларыбызны ача алганы өчен бик зур рәхмәт!