Кайбычлылар «Тарихи хәтер» федераль проекты кысаларында җиденче тапкыр оештырылган Халыкара акциягә кушылдылар
Безнең районда» Җиңү диктанты " дүрт мәйданчыкта: Олы Кайбычтагы Иҗтимагый үзәктә, Федоровка, Олы Яр буе һәм Чүти мәктәпләрендә узды. Анда төрле яшьтәге ике йөздән артык кайбычлы катнашты. Хөрмәтле кунаклар арасында Борындыктан 98 яшьлек тыл хезмәтчәне Фәйрүзә Фатыйхова, Россия Кораллы Көчләре ветераннары — отставкадагы майор Илһам Хөснетдинов һәм Әфганстандагы сугыш хәрәкәтләре ветераны Фират Миңнуллин бар иде. Акциядә катнашучыларны район башлыгының Бөек Җиңүнең 80 еллыгын бәйрәм итү һәм аңа әзерлек мәсьәләләре буенча ярдәмчесе Алия Биккулова сәламләде. Диктант язу шартлары белән мәгариф бүлеге методисты Энҗе Гарифуллина таныштырды.
Җиңү диктанты киң җәмәгатьчелекне Бөек Ватан сугышы тарихын өйрәнүгә җәлеп итү, яшьләргә тарихи грамоталылык һәм патриотик тәрбия бирү максатларында үткәрелә.