Татарстан Росреестры каршындагы Иҗтимагый советның беренче утырышы яңартылган составта узды
Татарстан Республикасы буенча Росреестр идарәсендә Татарстан Республикасы Иҗтимагый палатасы тарафыннан конкурс нигезендә төзелгән яңа составта Иҗтимагый советның беренче утырышы узды.
Утырышны ачып, Татарстан Росреестры җитәкчесе урынбасары Айназ Әхмәтова Иҗтимагый совет әгъзаларын сәламләде, ведомство эшчәнлегенең нәтиҗәлелеген күтәрүдә аның төп ролен ассызыклады һәм гражданнар, базарда профессиональ катнашучылар һәм бизнес-бергәлекләр мәнфәгатьләрендә нәтиҗәле эш теләде.
Совет рәисе итеп бертавыштан «Идел буе кадастр инженерлары ассоциациясе» СРО башкарма директоры Вадим Савельев, рәис урынбасары итеп шулай ук Татарстан Республикасы Иҗтимагый палатасы Рәисе урынбасары булган Мөнир Гафиятуллин сайланды. Иҗтимагый советның яңартылган составына барлыгы 14 кеше керде.
Вадим Савельев коллегаларына мөрәҗәгать итеп, хәзерге вакытта иҗтимагый советларның җәмәгать контроле субъектларының берсе булуын, аларның бурычы дәүләт хакимияте органнары эшчәнлеген күзәтү, шулай ук алар кабул иткән актларны һәм карарларны тикшерү һәм җәмәгатьчелек тарафыннан бәяләү булуын искәртте.
Үз чиратында, Мөнир Гафиятуллин билгеләп үткәнчә, иҗтимагый советлар – федераль дәүләт хакимияте органнары каршындагы декорацияләр түгел, ә реаль эшләүче иҗтимагый институтлар. Совет тәкъдимнәре, эксперт бәяләүләре һәм тәнкыйди искәрмәләр норматив базаны камилләштерергә, цифрлы карарларны кертергә һәм күчемсез милек өлкәсендә Росреестрның дәүләт хезмәтләрен күрсәтүгә бәйле процессларны гражданнар өчен үтә күренмәле һәм аңлаешлырак итәргә ярдәм итәчәк.
Беренче утырышның төп темаларының берсе Җир һәм күчемсез милек өлкәсендә закон чыгару яңалыклары булды. 1 нче номерлы күчемсез милеккә хокукларны дәүләт кадастр исәбенә алу һәм дәүләт теркәвенә алу бүлеге башлыгы Алсу Сафина әлеге теманы җентекләп яктыртты һәм сорауларга җавап бирде.
Шулай ук беренче утырышта агымдагы елга эш планы каралды һәм расланды. Иҗтимагый совет эшенең төп юнәлешләре итеп:
- хезмәтләрне цифрлаштыру-Росреестр сервисларын халык өчен тагын да уңайлырак итү;
- ведомствоара хезмәттәшлекнең нәтиҗәлелеген арттыру-хезмәт күрсәтүләрне оптимальләштерү өчен нинди адымнар кирәк;
- ачыклык һәм кире элемтә – гражданнарның дәүләт органнары эшенә ышанычын ничек көчәйтергә.
Татарстан Росреестры каршындагы Иҗтимагый советның киләсе утырышын быел июнь аенда уздыру планлаштырыла.