Кайбыч егетләре армиягә китә
Шушы көннәрдә генә Кайбыч тагын дүрт егетен армия сафларына озатты. Алар – Олы Кайбычтан Илнар Якупов, Хуҗа Хәсәннән Владислав Краснов белән Кузьма Мурсяков, Иске Тәрбиттән Андрей Михайлов. Әти-әниләре, туганнары, дуслары да озата килгән. Армиягә китүчеләр гадәттә балалар сәнгать мәктәбе янына җыела, бу көнне биредә гармун тавышы, җырлар тынып тормый. Район башлыгы урынбасары Рәмис Хәялиев аларга хәерле юллар, Кайбыч егетләре исеменә тап төшермичә хезмәт итеп, туган якларга исән-сау әйләнеп кайтуларын теләде, әниләренә истәлекле бүләкләр тапшырды.
– Егетләрне Ватан сагына гомер-гомергә әнә шулай җыр-биюләр, чиккән кулъяулыклар белән озатканнар. Бу бик матур күренеш. Гореф-гадәтләрнең буыннардан-буыннарга күчә баруы милли традицияләрнең саклануын күрсәтә, – диде Рәмис Рафисович. – Әмма әхлак кагыйдәләрен дә онытып җибәрергә ярамый, бигрәк тә җәмәгать урыннарында. Беркөнне шулай армиягә озатучыларның бии-бии такмаклап җырлауларына игътибар иттем. Кайберләренең сүзләре... бөтенләй колакка ятышсыз. Җырлаучыларга кисәтү ясамыйча булдыра алмадым. Мондый җырлар белән без яшьләргә нинди тәрбия бирәбез?
Җырның ертыгы юк, дисәләр дә, һәр нәрсәдә чама хисе булырга тиеш шул.