Кече Мәмедән сугыш ветераны Александр Ершов президент кулыннан тагын бер медаль алачак
Сугыш уты кичкән ветераннарның бәйрәмнәрдә генә кия торган орден-медальләр белән тулы костюмнарында ул көнне тагын бер медаль артачак.
– Бу очрашуга чакыруларына чиксез рәхмәтлемен. Узган язда да Президент белән очрашуга барган идем. Менә тагын насыйп булды, – ди ветеран үзе.
Фронтка 17 яшендә алалар аны.1943 елның августында 13 классташ егет берьюлы юлга кузгала да, яу кырыннан шуларның икесе генә – Александр Константинович белән Василий Чернов кына исән-сау әйләнеп кайта. Әнә ничек аяусыз булган каһәр суккан сугыш, типсә-тимер өзәрдәй егетләрнең чәчәктәй гомерен өзгән. Ершовның сугышчан юлы Рокоcсовский командалыгындагы беренче Белоруссия фронтында башлана. 108 нче понтон күперләр бригадасында шофер була, Польшаны фашист илбасарларыннан азат итүдә катнаша, Одер елгасын кичкәндә каты яралана. 1945 елның 1 гыйнварында туган авылына әйләнеп кайткан солдат әле бүген дә аягында һәм башында снаряд кыйпылчыгы йөртә.
Онык-оныкчыкларына, ә аларның саны илледән дә артып китә, медальләрен күрсәтә, сугышта күргәннәре турында сөйли. Сигез ел элек вафат булган тормыш иптәше Вера Трофимовна белән сигез бала тәрбияләп үстергәннәр алар. Авылның бердәнбер ветераны әфган уты кичкән улы Юрий гаиләсе белән кадер-хөрмәттә яши.
Ә юбилей медальләрен Кайбыч ветераннарына ямьле мартта тапшырачаклар.
Луиза СУНГАТУЛЛИНА