Татарстанда модернизациядән соң 30 почта бүлекчәсе ачылды
Татарстан Республикасы Рәисе Рөстәм Миңнеханов һәм Россия Почтасының «Идел буе» регионнар төркеме директоры Андрей Попов 30 почта бүлекчәсе эшен башлап җибәрделәр. Аларны узган ел авыл почта бүлекчәләрен модернизацияләү программасы буенча ремонтлаганнар, аны Россия почтасы Россия Федерациясе Президенты йөкләмәсе буенча 2022 елдан башлап гамәлгә ашыра, шулай ук Татарстан Республикасы бюджеты хисабына. Тантана дистанцион форматта Бәшир Рәмиев исемендәге Казан ИТ-паркында Татарстан Республикасы дәүләт идарәсен цифрлы үстерү, мәгълүмати технологияләр һәм элемтә министрлыгы коллегиясенең киңәйтелгән утырышы алдыннан узды.
Бу авыл җирендә яшәүче 75 000 гә якын татарстанлы өчен хезмәт күрсәтү сыйфатын күтәрде. Моңа кадәр Россия Почтасы модернизацияләү программасы буенча төбәктә 73 авыл бүлекчәсен ремонтлаган иде инде.
Узган ел Россия Почтасы һәм Татарстан Республикасы төбәктә почта челтәрен үстерү турында килешү төзеделәр, ул шулай ук почта бүлекчәләрен республика бюджеты хисабына модернизацияләүне күздә тота.
Почта бүлекчәләрендә эчке бүлмәләр һәм фасадлар, җылыту системалары яңартылган, янгын сигнализациясе һәм видеокүзәтү, шулай ук климат контроле һәм кондиционерлау өчен җиһазлар урнаштырылган. Операторлар өчен яңа техниканы онлайн-элемтә каналларына тоташтырдылар. Бүлекләрне модернизацияләгәндә киртәсез мохитне үстерүгә аерым игътибар бирелә. Моның өчен бүлекләргә керү урынында тоткалы пандуслар һәм персоналны чакыру төймәләре урнаштырылган, шулай ук ишек уемнарын киңәйткәннәр.
Чирмешән районының Бөркет-Ключ һәм Лашман авылларында бүлекчәләр тиз торгызыла торган конструкцияләрдән төзелгән яңа биналарга урнашты. Аларда почта бүлегенең бөтен функционалы һәм шундый ук җиһазлар һәм техника бар.
«Авыл җирендәге почта бүлекчәләре-мәктәп һәм кибет кебек үк кирәкле атрибут, - диде Рөстәм Миңнеханов. - Бүген ачылган 30 бүлек реконструкция узды, анда инде башка хезмәт шартлары һәм халыкка хезмәт күрсәтү сыйфаты. Федераль коллегаларыбызга бу программа өчен рәхмәт белдерәсем килә".
"Почтаның социаль миссиясе заманча почта сервисларыннан һәм социаль хезмәтләрдән бертигез файдалануны тәэмин итүдә чагыла. Бу бурычны хәл итәргә авыл почта бүлекчәләрен модернизацияләү программасы ярдәм итә. Ә Россия Почтасының республика белән конструктив партнерлыгы һәм Татарстан Республикасы Рәисе Рөстәм Нургали улы Миңнехановның шәхси ярдәме нәтиҗәсендә почта бүлекчәләрен яңарту темплары сизелерлек арта, бу авыл территорияләрендә яшәүчеләр өчен бик мөһим», ― дип билгеләде Андрей Попов.