Кайбыч муниципаль районы

Кайбычта Туган тел бәйрәме

2013 елның 29 апреле, дүшәмбе

Бәйрәм башланырга әле бераз вакыт барлыгыннан файдаланып, мәктәп укучылары музей хезмәткәрләре һәм китапханәчеләр оештырган «Тукай белән атлыйм киләчәккә» дигән күргәзмә белән таныша. Шагыйрьнең балалар өчен язган шигырьләреннән туплап, төрле рәсемнәр белән бизәп чыгарылган китаплары, төрле әкиятләрен үз эченә алган мультимедиа җыентыгы, Тукайның сыннары, портретларын зур кызыксыну белән карый алар. Рәссам Ильяс Айдаров ясаган зур картинаны Камилә, Алмаз, Гүзәл, Фирүзә, Адилә һәм башка кайбер укучыларның әле беренче генә тапкыр күрүе икән. Рәссам картинаның бер читенә: “Габдулла Тукайның остазы Мотыйгулла Төхвәтуллин. Уральский шәһәрендәге “Мотыйгия” мәдрәсәсе”, дип язып куйган. Музейның элеккеге директоры, район ветераннары Советы рәисе Әлфия апалары Закирова укучыларга нәсел җепләре Кече Кайбыч авылына барып тоташучы Мотыйгулла Төхвәтуллинның Тукай белән бәйләнеше турында сөйләде. Ул сөйләп бетерүгә, музей директоры Энҗе Миңгалиева әле шушы минутларда гына билгеле булган хәбәрне җиткерде: бүген опера сәхнәсе йолдызы – Мотыйгулла кызы Галия Кайбицкаяның оныгы, рәссам Ильяс Айдаров Тукай премиясенә лаек булган! Без аның Габдулла Тукайга багышланган сәнгать әсәрләре, Уральск һәм Казан шәһәрләрендәге Г.Тукай музейларындагы тематик күргәзмәләре өчен Тукай бүләгенә кандидат икәнлеге турында белә идек инде.

Туган тел көне әнә шундый шатлыклы рухта башланып китте. Башкарма комитет җитәкчесенең социаль мәсьәләләр буенча урынбасары Фатыйма Бикбова тәбрикләгәннән соң, сүз шигырь яратучыларга бирелде. Олы Кайбыч, Мөрәле, Кошман, Борындык мәктәпләренең шигырь яратучы, үзләре дә каләм тибрәтүче укучылары, һәвәскәр шагыйрә Мәүлиха Айзатуллина Тукай язган шигырьләрне күңелләрдә яңартты, үзләре иҗат иткән шигырьләрне сөйләде.

“И туган тел, и матур тел, әткәм-әнкәмнең теле

Дөньяда күп нәрсә белдем, син туган тел аркылы...”

Төрле җыр бәйгеләре җиңүчесе Инзилә Сираҗиевага кушылып “Туган тел”не җырлаганда, язгы җил тавышларыбызны бөтен Кайбычка таратты.

БАРЛЫК ЯҢАЛЫКЛАРНЫ УКУ