Синоптиклар 14 ноябрьдә Татарстанда һәм Казанда көчле җил вәгъдә итә

Бүген Татарстан Гидрометеорология үзәге белгечләре Татарстанда һава шартлары бозылу турында кисәтү таратты.

Татарстан Гидрометеорология һәм әйләнә-тирә мохитне күзәтү идарәсе фаразлары буенча, 14 ноябрьдә төнлә һәм көндез республикада урыны белән, шулай ук Казанда томан хасил булачак.

Моннан тыш, Татарстанда, шулай ук Казанда көчле көньяк-көнчыгыш җиле көтелә, ул секундына 15 – 17 метрга кадәр җитәргә мөмкин.

14 ноябрьгә каршы төндә Казанда 0 +2 градус җылы булачак. Тулаем алганда, республика буенча термометр баганасы -1 градустан +3 градуска кадәр тибрәләчәк. Юлларда бозлавык булу ихтимал.

Көндез Татарстан башкаласында һава +2 һәм +4 градуска кадәр җылыначак. Республикада 0 градустан +5 градуска кадәр җылылык көтелә.